Сииттэбит дьонун сэргэхситэ...

Сииттэбит дьонун сэргэхситэр санааттан, култуура үлэһиттэрэ ыйдааҕы былааны эрдэттэн торумнаан, кыттааччылары кытта бастаан кэпсэтэн, билсиһэн, олохтоох дьаһалтаны кытта биир санааннан, былааннанан үлэлии - хамсыы олорорбут кыайыылаах - хотуулаах буолара чуолкай. Платон Ойуунускай 130 сааһын көрсө, республикабытыгар Ийэ, төрөөбүт улууспут 85 сыллаах үбүлүөйүгэр, Саха АССР 100 сылларыгар аналлаах "Толкуйдаа! Онньоо! Кыай!" ток - шоу олус көхтөөхтүк ааста. Барыта күрэххэ 5 хамаанда оонньоото. Ол курдук олохтоох балыыһа коллективыттан, нэһилиэкпит убаастанар эмчиттэрэ Мария Иванова, Татьяна Герасимова, Сииттэ орто оскуолатын учууталлара Гаврил Петров, Агафья Дьяконова, "Чуораанчык" детсад үлэһиттэрэ Туяра Никитина, Екатерина Алексеева, олохтоох дьаһалта көхтөөх кыргыттара Туяра Винокурова, Александра Иванова уонна элбэх оҕо ийэтэ Марианна Захарованы кытта Сииттэ орто оскуолатын учуутала Мария Яковлева өркөн өйдөөхтөрүн, тобуллаҕас толкуйдаахтарын быһаарсар, элбэх интэриэһинэй боппуруостаах, олус бэһиэлэй, бэртээхэй тэрээһин буолан ааста. Тэрээһин түмүгүнэн олохтоох дьаһалта баһылыга күрэхтэһээчилэри өйөөн, өйдөөн Дьокуускай - Сииттэ - Дьокуускай хайысхатынан босхо барыы уонна кэлии сертификатын бэлэх уунан, кыайыылаахтар Марианна Захарова, Мария Яковлева тутаннар олус үөрдүлэр, махтаннылар. Манан эрэ бүппэтэ кыттааччылар бары биирдии тыһыынча сууммалаах сертификаттары тутан эмиэ олус астынан, дуоһуйан бардылар. Өрүү биһиги нэһилиэккэ ыытыллар эрэ тэрээһиҥҥэ буолбакка, бу билигин байыаннай операцияҕа сылдьар оҕолорбутугар тиийэ күүс - көмө буолар хаһаайыстыбаларбытыгар барҕа махтал тылларын тиэрдэбит Ольга Дмитриевна Левинаҕа, Софья Денисовна Николаеваҕа, Константин Константинович Александровка алгыс тыл бастыҥын тиэрдэбит, баҕарабыт баҕа санаа бастыҥын. Ити курдук кэлбит көрөөччүлэрбит, кыттааччыларбыт элбэҕи билэн - көрөн бардыбыт диэн санааларын тириэртилэр. Ыытыллар тэрээһиммитигэр өрүү күүс - көмө, сүбэ - ама биэрэр наставникпыт, олохтоох библиотека сэбиэдиссэйэ Мария Степановна Обутова. Өссө төгүл махтал улахан! Подробнее: https://xn--80aaacn2d.xn--p1ai/article/78659

Пост опубликован: 17.11.2022 09:00:14
Количество просмотров: 54